Markverður dagur að kveldi kominn. Ég tók daginn snemma til að gera verkefni fyrir skólann, kláraði það fyrr en áætlað var svo við ákváðum að skella okkur í bæinn, kaffihús eða eitthvað.
Viti menn, þegar við vorum ekki nema rétt hálfnuð á leið okkar þá blasti við okkur mikil samkoma. Jebbs,ungdomshus fólk var að safna sér saman þar sem markaðurinn er alltaf á Nörrebrogade. Við ákváðum því að stoppa og fylgjast með, þegar gangan var loks farin framhjá, svona um 10.000 manns, þá gátum við adrenalínfíklarnir ekki annað en flotið með og fylgdum í humátt á eftir.
Frekar vel skipulögð ganga að okkar mati, það voru alltaf bílar svona inn á milli með tónlist sem hélt fólkinu saman og svo einhver sem kallaði til fólksins og stjórnaði. Bíllinn sem var síðastur var með svo ömurlega leiðinlega tónlist svo við flúðum framar í gönguna(kannski trix hjá skipuleggjendum), sem endaði svo á því að við vorum næstum fremst. Þegar hér var komið við sögu þá var gangan komin að húsinu sem þau ætluðu sér að taka yfir. Þá fór lögreglan að skjóta táragasi að fólkinu, einhverjar stimpingar hafa nú líklegast verið þarna fremst. Allavega, þá byrjaði gasið að svífa þarna um og við hreinlega flúðum með tár í augum og illt í nefinu. Enda klukkan orðin 4 og við orðin glorsoltin. Lögregluþyrlan sem var á sveimi þarna yfir er enn á sveimi, endalaust af ungdoms fólki á Nörrebrogade að hlusta á tónlist, fá sér að borða og drekka og þess háttar. Lögreglan brunar hér fram hjá glugganum sem aldrei fyrr. Þessu er semsagt ekki enn lokið og nóttin ung. Efast samt um að þau hafi náð húsinu... en veit ekki, forvitnilegt að athuga þetta á morgun og sjá ummerkin.
Verður húsið í höndum Ungdoms fólksins eða lögreglu...?
Nú höfum við sem sagt prufað að "taka þátt" í alvöru kröfugöngu, væri gaman að sjá íslendinga standa svona saman. Þau eru að berjast fyrir því að fá hús. Væri gaman að sjá náttúruverndarsinna mótmæla jafn kröftuglega. Mér finnst málstaðurinn nú vera mikilvægari.
